Glæpir borga sig aldrei

Komin er niðurstaða í Baugsmálið og í ljós kom eftir 6 ára baráttu réttvísinnar að hinir ákærðu eru sekir.

Ekki treysti ég mér til að taka til nákvæmra lögskýringa og ber fyrir mig sömu ástæðu og hlutaðeigandi lögmenn; semsagt það að ég hef ekki lesið dóminn ennþá!

Þó sýnist mér að afleiðingin geti verið sú fyrir Jón Ásgeir að nú verði hann að gæta sín næstu 3 mán. og stilla sig um að hnupla súpu í Bónusverslun.

En í alvöru talað:

Mitt mat er það að í yfirfærðri merkingu jafngildi þessi dómur opinberri hýðingu á beran bossa þeirra sem að ákærunni stóðu og hafa nú aflað þjóðinni tjóns upp á hundruð milljóna.

En auðvitað kláraði ég aldrei lögfæðina.  

Dómar staðfestir í Baugsmáli

Athugasemdir

[Auðun Gíslason, 5.6.2008 kl. 17:14]

Af því að ég er að minnsta kosti jafnfúll og þú, þá er það nú dálítið fyndið, að sá sem kærði upphaflega þá Baugsmenn, Jón Gervaldur dæmdur í þriggja mánaða fangelsi skilorðsbundið í tvö ár (það er venjan).  En við hverju er að búast?  Starfsmenn Efnahagsbrotadeildar Ríkislögreglustjóra þekkja ekki muninn á Debet og Kretit.  Annars er Jón Ásgeir ábyggilega ekki einn um að búa til peninga með lánum og bókhaldskrullum.  Og í sjálfu sér ekkert athugavert við það.  Voru þessir peningar sem hann lánaði sjálfum sér nokkuð annað en tölur í bókhaldi og á einhverjum pappírum?  Þannig búa menn til peninga í dag.  Og nota ekki opinbera gjaldmiðla!

[Árni Gunnarsson, 5.6.2008 kl. 19:45]

Það er nú ekki svo einfalt að þekkja muninn á Debet og Kredit.

Hvorttveggja er útlenska!

Glöggur maður og öfgalaus sem ég ræddi við áðan gerði ráð fyrir að þetta fýlukast Davíðs kæmi til með að kosta þjóðina tugi milljarða.

Vísaði þá til væntanlegrar samþykktar Mannréttinadómstólsins á skaðabótakröfum Baugsmanna.

Ekki fyrsta snilldarbragð þessa ástmögurs frjálshyggjumanna á Íslandi.

[Auðun Gíslason, 5.6.2008 kl. 22:31]

Mér sýnist geðvondi lögfræðingurinn á góðri leið með að kosta stóran hluta þjóðarinnar tóm vandræði næstu árin!  Aðgerðaleysi Seðlabankans og þessarar aumu ríkisstjórnar er að keyra hér allt um koll.  Svo tala þeir um þessa kreppu sína einsog hverja aðra regnskúr sem almenningur eigi að bíða af sér.  Og á meðan eykur verðbólgan greiðslubyrðina af lánunum (og hún gengur ekki til baka) og rýrir um leið verðmætin sem lánin hvíla á.  Almenningur verður fátækari og fátækari, ríkisbubbarnir auðgast, bankakerfið fitnar einsog púkinn á fjósbitanum.  Það þarf ekki að segja  mér, að aðgerðarleysið stafi af andvaraleysi.  Nei, þetta er þaulskipuleg atlaga að lífskjörum okkar. 

[Helga Guðrún Eiríksdóttir, 7.6.2008 kl. 16:42]

Veit einhver hvað þetta skrípamál kostaði í heildina þegar upp er gert?

 

[Árni Gunnarsson, 7.6.2008 kl. 23:19]

Nei Helga Guðrún, það hafa engar nákvæmar tölur verið birtar en þar eru engar smáupphæðir í umræðunni. Og svo segja hráar tölur um beinan sakarkostnað nánast enga sögu.

Allur beinn og óbeinn kostnaður sakborninga af þessu fjaðrafoki í 6 ár og laskaður trúverðugleiki þeirra í alþjóðlegum viðskiptum er svo annað dæmi sem aldrei verður gert upp.

Sömuleiðis góða helgi!