Vitnað í karlinn í brúnni

Ég var að lesa athyglivert viðtal í Fiskifréttum. Rætt var við Snorra Snorrason skipstjóra á Klakki S H sem fiskaði fyrir 1,150 milljónir á s.l. fiskv. ári. Þetta eru mestu aflaverðmæti íslensks ísfisktogara á því ári.

Ég leyfi mér að vitna beint í viðtalið:

"Víðast hvar á Vestfjarðamiðum og úti fyrir Norðvesturlandi hefur verið hægt að fátonn af þorski á togtímann. Þegar þess er gætt að nóg er af þorski út um allt er harla öfugsnúið að ekki skuli vera gefinn út meiri kvóti. Það mætti hiklaust veiða 220- 240 tonn af þorski án þess að skaða stofninn. Ég hef enga trú á togararallinu sem aðferð til að mæla stærð þorskstofnsins. Sem dæmi get ég nefnt að þegar eitt rallskipana, Jón Vídalín, var á Vestfjarðamiðum vorum við á svipuðum slóðum að fá 4-5 tonn í holi í hitaskilum sem fiskurinn sækir í. Rallskipið átti hins vegar togslóð sem var 700-800 föðmum utan við okkur og þar fékk það 400-500 kíló í holi enda var það í ísköldum sjó............"

Hér er að sjálfsögðu aðeins sá hluti viðtalsins sem snýr að þorskveiðikvótanum og því sleppt sem Snorri skipstjóri segir um innköllun aflaheimildanna, en þar er hann á öndverðum meiði við mig og mín skoðanasystkini. 

Athugasemdir

[Níels A. Ársælsson., 21.1.2011 kl. 17:30]

Sæll Árni.

Allt er þetta gert með ráðnum hug og ástæðuna vita margir.

[Árni Gunnarsson, 21.1.2011 kl. 18:00]

Já Nilli, líklega vita þeir ástæðuna sem ekki hafa ákveðið að hafna henni.

[Óskar Arnórsson, 21.1.2011 kl. 18:08]

Það vita allir sem einhverntíma hafa mígið í saltan sjó að mælingar Hafró eru bara bull. Menn vita miklu meira um tunglið enn hafið. Einfaldlega vegna þess að það eru ekki til mælitæki á jörðinni til að gera mælingar af viti í hafinu. Eitthvað vita menn, enn ekkert sem getur ákveðið með neinu viti.

Enn það þýðir ekki að ekki sé hætta á ofveiði á einhverjum svæðum. Það má loka hrygningarsvæðum ákveðin tímabil eins og alltaf hefur verið gert. Stærð fisks á að mæla um borð í fiskibátum og togurum, enn ekki á einhverju ralli.

Að það veiðist vel á Klakki er bara meiriháttar gott og óska ég skipverjum til hamingju með aflann. Enn fiskikvótar eru hrein svik og prettir. Verndar engan fisk né botn. Til að stýra veiðum frá Íslandi þarf að stjórna stærð fiskiflota og ekkert annað. Smábátaveiðum á landgrunni á að sleppa lausum algjörlega, enn samt ákveða stærð þess flota líka. Stærð fiskiflota er viðráðanleg, enn kvótakerfi og gerfivísindi Hafró eiga menn bara að skammast sín fyrir, laga og gleyma sem fyrst.

[Óskar Helgi Helgason (IP-tala skráð) 21.1.2011 kl. 22:15]

Heill og sæll Árni; æfinlega - sem aðrir gestir þínir !

Frásaga Snorra skipstjóra; kristallar amlóðahátt og ódöngun Jóhanns frænda míns Sigurjónssonar - og hans slektis, hjá Hafrannsókna stofnun.

Hvernig; fóru menn að, áður en þessir spé koppar, suður við Skúlagötu, í Reykjavík, fóru að láta að sér kveða, með möppu fargan sitt - sem glærur, Skagfirðingur góður ?

Með beztu kveðjum; sem jafnan, úr Árnesþingi /

Óskar Helgi 

[Kristinn Pétursson, 21.1.2011 kl. 23:06]

Þetta minnir óneitanlega mikið á það sem kallað er heimska.

Skipsjórar flotans ættu að fá að tjá sig miklu meira um galla við stofnsærðarmælingar og veiðiþol fiskistofna.

Það kæmi mér ekki á óvart að flestir botnlægir fiskistofnar væru nú vanmetnir um helming.  Alla vega er  afli á línubáta alt í kring um landið undnfarin ár - 2-300% umfram það sem var á þeim árum þegar þorskstofninn var talinn vera 1100 þúsund tonn - fyrir 2-3 áratugum.

Afli á sóknareining í botntroll er á lílklga einnig meiri - en því gæti t.d. þessi ágæti skipstjóri svarað - sem einn af fáum skipstjórum hefur nú þorað að tjá sig í fjölmiðlum.

Ég vil að skipstjórar tjái sig meira um þetta. Þjóðin þarf nú á röddum skipstjórnamanna að halda - hvað varðar veiðiþol fiskistofna.

[Árni Gunnarsson, 21.1.2011 kl. 23:46]

Þakka innlit ykkar ágætu nafnar. Það gremjulegasta er nú að -eins og Kristinn P. segir - þá minnir þetta ástand og deilur ævinlega á svo átakanlega heimsku. Og þessi heimska Hafró er áreiðanlega af einhverjum öðrum toga en þeim sem heimska byggist venjulega á.

[Lúðvík Júlíusson, 23.1.2011 kl. 10:13]

Það verður samt að forðast að hlusta of mikið á skipstjóra, þó svo að þeir eigi auðvitað að hafa vægi í umræðunni.  Þeir vilja fá að veiða meira alveg eins og bankamennirnir vildu meiri pening og gátu sannfært "okkur" um að þetta væri allt í lagi.

[Árni Gunnarsson, 23.1.2011 kl. 11:56]

Það þarf fyrst og fremst að draga þessa umræðu upp úr skotgröfunum Lúðvík. það er lágmarkskrafa þegar um svo veigamikið hagsmunamál er að ræða sem stjórnun á sókn í þessa mikilvægustu auðlind þjóðarinnar.

Mér er ómögulegt að sjá þörfina fyrir alla þessa friðun á grunnslóð t.d. Ég kem ekki auga á  þörfina fyrir verndun smáþorsks á sama tíma og skortur er á æti, t.d. sandsíli. 

Það má sanna að lína og handfæri hafa engin áhrif á viðgang stofna. Samt eru þessi veiðarfæri háð aflaheimildum. 

Við eigum marga staðbundna þorskstofna að mati vísindamanna og skipstjóra. Samt eru þessir stofnar ekki skilgreindir á nokkurn hátt þegar að friðun kemur. Ekkert bannar það að veidd séu tugir þúsunda tonna á einu svæði og heildarkvótinn kláraður og ekki sé dýft veiðarfæri í sjó á öðrum svæðum. Er þetta vísindaleg stofnvernd?

Skelfilegust er þó umræðan um innköllun aflaheimilda frá stórum útgerðum. Þar er talað um að rústa útgerð á Íslandi!!!  Hvers konar bull er þetta eiginlega? Geta stórar útgerðir ekki greitt leigugjald af auðlindinni- og ef ekki - af hverju? Hvernig getur lítil útgerð greitt sægreifa leigu, 160 kr. kg. en sú sægreifinn þarf bara að fá milljarðaafskriftir?

Hvernig getur tveggja trillubáta útgerð náð sér í nærri þriggja milljarða lán í banka og fengið það afskrifað ári eftir að hafa greitt 600 milljónir í arð til eigenda?  Er engin ástæða til að þetta sé rætt og fólki ofbjóði?

Það eru svo fjölmörg fleiri atriði þessa máls sem þarf að ræða án þess að vera með upphrópanir.

Til dæmis það að auðlindirnar á þjóðin og svo þarf að úrskurða það pólitískt hvort mannlíf og hamingja fólksins í hrundum sjávarbyggðum sé verðlaust á kvarða hagvaxtarins.

[Árni Gunnarsson, 23.1.2011 kl. 12:18]

.......biðst afsökunar á hroðvirkni og innsláttarvillum og spyr um leið: Er mikilvægt að vernda sýkta hafsíld sem hnappast saman í víkum á grunnslóð? Mér finnst einboðið að þessi síld sé veidd til bræðslu og látin skapa milljarðaverðmæti fremur en að sýkin sé vernduð af vísindaakademiunni til framhalds í stofninum. Bændur skera niður þegar sauðfjárpestir gera vart við sig en vernda ekki sýktar ær og fjölga á fóðrum.

[Lúðvík Júlíusson, 23.1.2011 kl. 12:52]

Árni,

ég er mjög sammála þér í þessari umræðu.  Ég vildi bara benda á að skipstjórar eru líka fólk, og sumir auðvitað alveg frábærir og sérstaklega snallir.

[Árni Gunnarsson, 23.1.2011 kl. 13:27]

Ég skildi þig líka Lúðvík og er mjög sammála því aðskipstjórar eru sjaldan hlutlausir. Mér sýnist reyndar að sumir þeirra hneigist til þess að draga taum sinna útgerða í skoðanaskiptum um þessi efni fremur en að leggja á þau hlutlægt mat.

Ég bendi á t.d. formann Farmanna -og fiskimannasambandsins.