Árni Gunnarsson

16.1.2008 | 17:28

Vinaráðningar

Fátt vekur þægilegri tilfinningu en tilhugsun um góða og trausta vináttu. Góðu heilli á þetta fyrirbæri samfélagsins langa sögu með þjóðinni og er nærtækast að nefna vináttu þeirra Gunnars á Hlíðarenda og Njáls á Bergþórshvoli sem greint er frá í hinu merka fornriti Njálu.

Íslensk stjórnsýslulög gera ekki ráð fyrir vináttu þegar ráðið er í embætti og munu gilda þar um nokkuð skýrar reglur, þ.e. að skylt sé að ráða hverju sinni þann hæfasta. Þessi regla hefur þó oftar en skyldi verið lögð til hliðar ef marka skal þær,- oft háværu deilur um embættisráðningar og allir ættu að þekkja og muna. Hafa alloft vaknað ásakanir um að þessar embættisveitingar hafi fremur borið svip af vinargreiða en faglegum niðurstöðum.

Þessa dagana logar samfélag okkar í deilum vegna ráðningar í embætti dómara. Þessi ráðning var um nokkur efni líkleg til að vekja athygli vegna þess að ráðherra málaflokksins vék sæti og skipaði fjármálaráðherra til að fullnusta verkið. Fjármálaráherra er sem kunnugt er menntaður dýralæknir sem er vissulega gagnleg menntun í tilliti búfjársjúkdóma en er ekki viðurkennd sérþekking í lögfræðilegum álitaefnum.

Lögskipuð fagnefnd skilaði áliti á þeim fimm lögmönnum sem um starfið sóttu og setti þrjá í efsta flokk af fimm. Í næsta flokk var enginn settur en tveir voru taldir hæfir. Enginn var talinn vanhæfur. Árni M. Mathiesen fjármálaráðherra skipaði annan af tveimur þeirra sem töldust mega kallast hæfir en hafnaði öllum þrem sem töldust ágætlega hæfir. Þetta veit núna öll þjóðin og einnig það að sá sem skipaður var er sonur Davíðs fyrrv. forsætisráðherra sem er afar umdeildur maður og býr reyndar að meiri óvild mikils hluta þjóðarinnar að minni hyggju en mörg dæmi eru um í dag.

Fjölmargir tóku til máls og gagnrýndu harðlega þessa ráðningu og töldu einboðið að þarna hefði verið farið gegn reglum sem skylt hefði verið að hafa í heiðri. Þar tóku til máls fulltrúar álitsnefndarinnar ásamt nokkrum þjóðþekktum lögmönnum og meðal annara Sigurði Líndal fyrrum háskólaprófessor sem mun í dag njóta óskoraðrar virðingar umfram flesta aðra í lögmannastétt.

Fjármálaráðherra tók þegar til varna og gerði lítið úr áliti allra þeirra lögspekinga sem gert hefðu ráðninguna tortryggilega, sagðist hafa valið hæfasta manninn.

Og þrátt fyrir allar lögfræðilegar ofanígjafir heldur ráðherrann sig ennþá við sína hrokafullu skýringu.

"Ég valdi hæfasta manninn!"

Auðvitað var það ákveðið strax og Þorsteinn Davíðsson sótti um að hann hlyti starfið. Það vitum við öll. En Árni Mathiesen féll á prófinu og hann féll á hrokanum. Hann átti aðeins eitt svar:

-Þorsteinn Davíðsson er vinur minn. Ég þekki hann að góðum gáfum, fjölþættri menntun og flestu því sem góðan dreng má prýða. Þrátt fyrir að hann búi að minni reynslu og jafnvel minni menntun en nokkrir hinna umsækjendanna treysti ég honum fullkomlega til að takast á hendur þetta ábyrgðarstarf og hef ákveðið að veita honum starfið. Ég er þess fullviss að hann muni gegna því með sóma.

Yfirlýsing í þessa veru hefði ekki stöðvað réttmæta gagnrýni en sjálfur hefði Árni staðið keikari eftir að mínu mati.

Þá, og þá fyrst hefði hann getað vísað til þess að embættisráðningar hafi fyrr verið umdeildar.

Flokkur: Stjórnmál og samfélag | Facebook

Athugasemdir

Og tók dýralæknirinn ekki nema 3 klst. að komast að þessari vel ígrunduðu niðurstöðu:

Það ku hafa borið upp á einn og sama daginn að umsækjendum var tilkynnt kl. 11:30 að morgni að Björn Bjarnason hafi vikið sæti vegna skipunar héraðsdómara þar sem hann hafi veitt einum umsækjenda meðmæli og að Árni Mathiesen væri settur dómsmálaráðherra í hans stað, síðan kl. 14:30 um eftirmiðdaginn þá var Árni Mathiesen búinn að fara yfir umsóknir fimm umsækjenda, meta þær, bera þær saman við niðurstöðu dómnefndar, greina ágallana í þeirri niðurstöðu, ákvarða hver væri hæfastur og tilkynna það umsækjendum. Við höfum ekki séð svona snaggaraleg vinnubrögð síðan erlend kærasta framsóknarráðherrasonar þurfti íslenskan ríkisborgararétt til að komast til náms í Bretlandi.

Sigurður Ingi Jónsson, 16.1.2008 kl. 14:56

Ævar Rafn Kjartansson, 16.1.2008 kl. 22:44

"There is something rotten in the state of former Danmark ..."

Steingrímur Helgason, 16.1.2008 kl. 23:35

Eins og ég benti á hér að ofan þá var aldrei um að ræða mat á umsækjendum. Og það hefði verið mannlegra að segja sannleikann en að falla í þá voðalegu gryfju að vera með stærilæti. Verst af öllu er þó að þetta er eitt prófið í viðbót við mörg slæm sem þessi trúarsamtök frjálshyggjunnar falla á þegar valið er í dómarastöður.

Og það er grafalvarlegt mál þegar stærstur hluti dómstólanna situr í þakkarskuld við valdstjórnina.

Árni Gunnarsson, 16.1.2008 kl. 23:36

Já, Steingrímur. Það er spurning hvort við áttum nokkurn tíman að koma okkur upp þessu "former."

Árni Gunnarsson, 16.1.2008 kl. 23:39

Hvort skyldi það verða Dalla eða Tinna sem verður næsti forseti Íslands? Spennandi þegar fleiri en einn koma til greina. Hvor þeirra skyldi vera meiri pabbastelpa?

Helga Guðrún Eiríksdóttir, 20.1.2008 kl. 17:04

Af hverju ekki Dorrit?

Hillary Clinton er að taka BNA með stæl.

En ef tilgáta þín stenst þá verður það auðvitað árás á þá þeirra sem sækist eftir kosningunni ef hún verður ekki valin.

Og að sjálfsögðu grimmileg hatursárás á Ólaf Ragnar.

Árni Gunnarsson, 20.1.2008 kl. 19:55

Á ekki nafni hans Eff einhverja krakkalús sem verður mætt til starfa hjá einhverju toppfirmanu í fyrramálið? Einhvern vegin yrði ég ekkert hissa.

Helga Guðrún Eiríksdóttir, 22.1.2008 kl. 02:28

Kíkti aðeins í dagbók dómsmálaráðherra Björns Bjarnasonar. Eftirfarandi stendur þar:

Frá því að ákvæði um aðstoðarmenn ráðherra voru sett hér í lög hefur fjöldi manna gegnt þeim störfum eins og sjá á skrá, sem birt er í Sögu stjórnarráðsins frá 2004. Árni M. Mathiesen, settur dómsmálaráðherra, telur, að ekki hafi verið tekið nægilegt tillit til starfa Þorsteins Davíðssonar sem aðstoðarmanns dómsmálaráðherra í mati nefndar á hæfi umsækjenda um dómarastörf. Vegna ráðherrastarfa sinna á Árni miklu auðveldara með það en umsagnarnefndin að gera sér grein fyrir inntaki starfs aðstoðarmanna - viðfangsefni þeirra ráðast að sjálfsögðu af verkefnum ráðherrans.

Jaha þá vitum við hvaða viðhorf hann hefur til ATH. umsagnarnefndarinnar.

ee (IP-tala skráð) 24.1.2008 kl. 23:44